الخليقة

أهلا بيكم حبايبي ، الأولاد والبنات، في مغامرة جديدة، وأحداث جديدة في الكتاب المقدس.

هنتكلم اليوم عن الخليقة، زي ما نشوفها في سفر التكوين في الكتاب المقدس.

في الماضي البعيد، خلق الله الأرض وكل الكون. بس في الأول كانت المياه مغطية كل حاجة في الأرض، ومش ظاهر حاجة من الجبال، ولا الرملة، ولا اليابسة، يعني مش جاهزة للسكن فيها. ربنا عمل فيها حاجات، وأعدها علشان ينفع الناس وكل المخلوقات تعيش فيها.

في أول يوم عمل في الأرض: ربنا قال: "ليكن نور"، فكان كده بالضبط !.

وفي تاني يوم خلق ربنا الجلد (السما) اللي بنشوف لونها لما ننظر لفوق.

وفي اليوم الثالث: فصل ربنا بين اليابسة والمياه، يعني خللى المياه في مكان، والأرض اليابسة في مكان، ودعا اسم اليابسة أرض، والمياه دعاها بحار، وكمان خلق النباتات الكتير بكل ألوانها الجميلة، وأشكالها الرائعة.

وفي اليوم الرابع: خلق الله الشمس والقمر والنجوم الكتير اللي بنشوفها بالليل.

وفي اليوم الخامس: خلق ربنا الطيور الكتير اللي بتطير في السما، وكمان الأسماك الكتير اللي عايشة في المياه.

أما في اليوم السادس: خلق الرب كل الحيوانات، وكمان خلق آدم وحواء. وربنا قال لآدم خللي بالك من الخليقة، بعد ما جهز له كل حاجة محتاجها. وقام آدم سمى كل الحيوانات والطيور بأسمائها، وكان آدم وحواء عايشين في حديقة جميلة، اسمها "جنة عدن".

وفي اليوم السابع استراح الرب من كل العمل اللي عمله، وشاف إن كل حاجة عملها جميلة جدًا.

نشوفكم المرة اللي جاية في مغامرة جديدة